- భూమి పుత్ర ఆత్మ టీజీఓ దార్శనికత – విధేయత చూపడమే మన నైతికత
వ్యాసకర్త : అస్నాల శ్రీనివాస్ – సంపాదకులు టి జి ఓ న్యూస్
రాష్ట్ర ప్రభుత్వ ఉత్తమ ఉపాధ్యాయ , సామాజిక కార్యశీలి పురస్కారాల గ్రహీత, కాలమిస్ట్ ,పోటీ పరీక్షల నిపుణులు ,దొడ్డి కొమురయ్య ఫౌండేషన్ వ్యవస్థాపకులు
TGO NEWS : TGO history and activites తెలంగాణ ….చరిత్రలో పాలకులు ఎవరైనా సరే ఎల్లకాలం ఎవరి ఉక్కుపాదం కింద నలగలేదు,గుండెలను చీల్చే అవమానాన్ని సహిస్తూ ఉండలేదు,,కన్ను పొడిచిన కనిపించని కటిక చీకట్లను చూస్తూ కూర్చోలేదు,తనపై అనంతంగా కొనసాగుతున్న అగచాట్లను భరించలేదు.ఓర్పు,సహనానికి హద్దులు ఉంటాయని ,ఆ సరిహద్దులు చెరిపేసి పెత్తనం చెలాయించే వర్గం పై ధిక్కారాన్ని కొనసాగించిన నేల.తిరుగుబాటు పై తిరుగుబాటు తెలంగాణ డి యన్ ఏ లో అంతర్భాగమై ఉన్నది.ఎంతటి విప్లవకారిణో అంతటి సత్యాగ్రహి,ఏంతటి భిన్నత్వమో అంతటి ఏకత్వము.ఇదే తెలంగాణ అంటే ప్రపంచానికి పరిచయమైన తీరు.
TGO history and activites
మానవ నాగరికతకు ఆరంభ ఆనవాళ్లుగా విలసిల్లిన గోదావరి లోయ పరీవాహక ప్రాంతం తెలంగాణ సొంతం.
బుద్ధ,జైన,శైవ,వైష్ణవ సాంప్రదాయాలను అక్కున చేర్చుకున్న అద్వితీయ మాగాణం. శాతవాహనులు, ఇక్ష్యాక్వులు, కాకతీయులు ఢిల్లీ సుల్తానులు,కుతుబ్ షాహీలు ,అసఫ్ జాహీలు మక్కువతో ఏలిన డెక్కన్ పీఠభూమి హృదయం తెలంగాణ.పాలకులు నీతి తప్పినప్పుడు,సమస్యల పరిష్కారంబదులు అణచివేతను ఉపయోగించినప్పుడు సమర శీల పోరాటాలను రుచి చూపించిన నేల.కాకతీయుల పై,సమ్మక్క సారక్క ,కుతుబ్ షాహీల పై సర్వాయి పాపన్న, అసఫ్ జాహీల పై ,దొరలపై బందగీ,దొడ్డి కొమురయ్య, ఐలమ్మలు వంటి మట్టి బిడ్డలు విప్లవాగ్నులు వెదజల్లిన నేల. సాహిత్యం పై సంస్కృత భాషా అధిపత్యాన్ని సహించని నేల.చక్కని తెలంగాణ దేశీ తెలుగులో బసవపురాణం వంటి గ్రంథాలను రాసిన పాలకుర్తి సోమనాథుడు,సాహిత్యం రాజుకు చెందదు,అది ప్రజలకు చెందుతుంది అని ప్రకటించి ఆంధ్ర మహా భాగవతం రాసిన బమ్మెర పోతన వంటి యోధులతో పునీతమైన నేల.
సైమన్ బొలివర్ ప్రతిపాదించిన భూమి పుత్ర సిద్ధాంతం అనేక లాటిన్ అమెరికా ,ఆసియా దేశాలను కదిలించాయి.పరాయి పాలన ,వారి ఆధిపత్యంనుండి విమోచనం ,దేశాలు స్వాతంత్ర్యము కోరుకోవడానికి,జాతులు విముక్తి పొందడానికి ,స్థానిక వనరులు ,ఉపాధి అవకాశాలు స్థానికులకే చెందాలని .తమఉనికిని ఆత్మ గౌరవాన్ని నిర్ధారించే అంశాలను ప్రాణ ప్రదంగా కాపాడుకోవాలని ప్రత్యేక సంస్కృతి భాషా వ్యవహారాలు రక్షణ భూమి పుత్ర సిద్ధాంతం సారాంశం. నిర్దిష్ట బౌగోళిక రాజకీయ ప్రాంతానికి చెందిన వారే స్వయం పాలన చేపట్టాలనే కూడా ప్రతిపాదించింది.ఈ వెలుగులో ఆయా ప్రాంతాల ప్రజలు అపార త్యాగ పూరిత పోరాటాలతో ,దీర్ఘకాలిక మంచి భవిష్యత్ తమ జీవితాలను పణంగా పెట్టి మార్పుని సాధించుకున్నారు.ఇంకా ఆ పరంపర ప్రపంచంలో ఏదో ఒక మూల ప్రజ్వరిల్లుతూనే ఉంది.ఈ పోరాటాలలో సాధారణ ప్రజలు తమను తాము విప్లవకీరించుకుందని పాల్గొన్నారు. ప్రభుత్వ విధేయంగా కొనసాగే ఉద్యోగులు పాల్గొన్న సందర్భాలు అతి స్వల్పం.
ఈ తాత్విక నావ,జ్వాల 1946 లో హైద్రాబాద్ సంస్థానంలో ప్రవేశించింది.ముల్కీ ఉద్యమ రూపంలోస్థానికులకే ఉద్యోగ అవకాశాల కోసం విద్యావంతుల సారధ్యంలో కొంత కాలం కొనసాగింది.సొంత భాషా సంస్కృతుల కు పాలకుల నుండి నిరాదరణ,పాలకుల అధికార భాష,ఉన్నత ఉద్యోగాలలో ఉన్న వలసదారుల భాషా సంస్కృతి తెలంగాణ సంస్కృతి గా చలామణి అవుతున్న హైద్రాబాద్ సంస్థానంలో సురవరం ప్రతాపరెడ్డి నేతృత్వంలో మన భాషా సంస్కృతుల పునరుద్ధరణ ప్రయత్నాలు కొనసాగాయి.తెలంగి భేలాంగి అని తెలుగును అపహాస్యం చేసినప్పుడు గోల్కొండ కవుల కవితల ,కథల సంచికని వెలువరించి తెలంగాణ అంటే ఎరుపెక్కిన నేలే కాదు,సాహిత్య హరితవనాలు ఉన్నాయని నిరూపించారు.కమ్యూనిస్ట్ లు కొనసాగించిన తెలంగాణ సాయుధ రైతాంగ పోరాటం వలన నిజాం రాజు బలహీనం కావడం,హైద్రాబాద్ సంస్థానం భారత్ లో విలీనం అవడం జరిగింది.1956 లో తెలంగాణ ,ఆంధ్రల విలీనం ,ఉమ్మడి ఆంధ్రప్రదేశ్ ఏర్పాటు అనంతరం దక్కన్ పీఠభూమి ఆత్మ తెలంగాణ గోసకు లోనైంది.శతాబ్దాలుగా సొంత రాజ్య హోదాను ,ప్రత్యేక పాలన రాజకీయ బౌగోళిక హోదా ఉన్న తెలంగాణను కోల్పోవడం జరిగింది.చరిత్రలో అతి పెద్ద విషాదంగా ,తెలంగాణ మానవ జీవన సంక్షోభాన్ని కల్గించిన ఘటనగా మిగిలిపోయింది. కోల్పోయిన తెలంగాణ ను తిరిగి సాహించడానికి 60 సంవత్సరాల సుదీర్ఘ పోరు, అణచివేతలు, బలి దానాలు తెలంగాణ చవి చూడాల్సి వచ్చింది.పాలన ,సంస్కృతి అవకాశాలు,వనరుల పై ఇతర ప్రాంత ఆధిపత్యం కమ్మేసింది.స్థానికులను మరింత పరాయిగా చేసింది.
విలీన ఒప్పందాలు,ఆరు సూత్రాల పథకం యధేచ్ఛగా ఉల్లంఘిస్తున్న ఉమ్మడి రాష్ట్రంలో,సమస్త అవకాశాలు తెలంగాణ వాసులకు మృగ్యమైతున్న కాలంలో 1969 ఉస్మానియా ,కాకతీయ విద్యార్థులు మన తెలంగాణ మనకు కావాలి అని మిలిటెంట్ పోరు బాట పట్టారు.370 మంది అమరులు అయ్యారు. ఇదే క్రమంలో 1946 లో ఏర్పాటైన హైద్రాబాద్ ఉద్యోగుల సంఘం ,తెలంగాణ నాన్ -గెజిటెడ్ అధికారుల సంఘంగా రూపాంతరం చెంది విద్యార్థుల పోరుకు బాసటగా నిలిచింది.టి యన్ జి ఓ సంఘ ఏర్పాటు ఉద్యోగ ఉద్యమాల చరిత్రలో ఒక అపురూప ఘట్టం. ప్రభుత్వాన్ని ధిక్కరించడమంటే దేశ ద్రోహం అనే పరిస్థితులు ఉన్న కాలంలో తెలంగాణ కు ,ఉద్యోగులకు జరుగుతున్న వివక్షత .అన్యాయాలపై సాహసోపేతంగా గొంతెత్తి తెలంగాణ ఉద్యమ కాంక్షని సజీవంగా కొనసాగించింది.
1946 లో ఏర్పాటైన హైద్రాబాద్ ఉద్యోగుల సంఘం ,తెలంగాణ నాన్ -గెజిటెడ్ అధికారుల సంఘంగా రూపాంతరం చెంది విద్యార్థుల పోరుకు బాసటగా నిలిచింది. – అస్నాల శ్రీనివాస్
తెలంగాణ .. గెలుపు ఓటములతో నిమిత్తం లేకుండా ప్రజల చైతన్యం ,సంసిద్ధత ఆధారంగా స్వరాష్ట్ర సాధన కోసం పోరాట స్రవంతిని ఆపలేదు.1969 తొలి దశ ఉద్యమం విఫలమైన తర్వాత 1970.80,90 దశకాలలో నక్సలైట్ ఉద్యమము వెల్లువలా తెలంగాణలో వ్యాపించింది.వనరులు ఉత్పత్తి సాధనాలు ప్రభుత్వ రంగంలో ఉండాలని .ఉపాధి ఒక ప్రాథమిక హక్కుగా ,అంతరాలు లేని సమాజం కోసం సాయుధపోరును జరిపారు.మెడికల్,ఇంజనీరింగ్ వంటి ఉన్నత చదువులు చదువుతున్న యువతరం ఈ ఉద్యమంలో ఆకర్షితులయ్యి తమ విలువైన ప్రాణాలను పోగొట్టుకున్నారు.గొప్ప మేధో నైపుణ్యాలున్న రెండు తరాల యువత ప్రభుత్వం మీద చేసిన యుద్ధంలో ఒరిగిపోయారు.
తెలంగాణ ఒక వైపు కల్లోల భరితం,మరొక వైపు వరుస కరువులు ,నీళ్లు,నియామకాలు,నిధులలో తీవ్ర వివక్షతో జీవన సంక్షోభం ఏర్పడింది.నిరాశ,నైరాశ్యం లో ఉన్న ప్రజానీకాన్ని రాజ్యాంగ చట్రంలో,అది ఇచ్చిన సానుకూలతలో వెలుగులో రాష్ట్ర సాధన కోసం ప్రజాస్వామిక పోరాట రూపాలను తెలంగాణ ఎంచుకున్నది. దాదాపు అన్ని రాజీకీయ సంస్థలు ప్రజల ఆకాంక్ష వైపు నిలబడక తప్పలేదు.
తెలంగాణ లో జరుగుతున్న వివిధ సామాజిక పోరాటాలలో గెజిటెడ్ ఉద్యోగులు గణనీయమైన పాత్ర పోషించలేదు. అత్యధికులు ప్రేక్షక పాత్ర పోషించే పరిస్థితి ఎక్కువకాలం కొనసాగింది.గెజిటెడ్ ఉద్యోగులు తమ బదిలీలు ,జీతభత్యాల కోసం టి యన్ జి ఓ నిర్వహించే పోరాటం ఫలితాలపై ఆధారపడేవారు. ఈ ఖాళీని నింపడానికి ,అధికారులు,అన్ని కేడర్ల గెజిటెడ్ ఉద్యోగులు మౌనాన్ని వీడాలి,స్వరాష్ట్ర ఉద్యమంలో భాగమవ్వాలి. తీవ్ర అన్యాయాలు జరుగుతున్నప్పుడు, సంఘర్షించాల్సిన సామాజిక చారిత్రక సందర్భంలో మౌనంగా ఉండడం ఒక నేర భావన ,తాము స్పందించాలి అనే కదలిక గెజిటెడ్ అధికారులలో వచ్చింది.ఇప్పుడు కాకపోతే ఇంకా ఎప్పుడు రాదు,పట్టనట్టుగా ఉండడం ఒక చారిత్రక అపరాధం అనే భావనకు లోనయ్యారు.
అధికారులు, ఉన్నత విద్యావంతులు, మేధావులు అంబేద్కర్ చెప్పినట్టు “పాలించే వర్గం కానప్పటికి సమాజంలో మేధావులు ప్రభావశీలంగా ఉంటారు ,వారు భవిష్యత్ ను చూడగలిగి మార్గదర్శనం చేసి నాయకత్వం వహిస్తారు. ప్రజల ప్రగతి కోసం నిలబడుతారు .ఈ క్రమంలో ఎదురయ్యే ఒత్తిడులను అణచివేతను ప్రమాదాలను ఎదుర్కోవటానికి సిద్ధమవుతారు .తాము ఎదిగి వచ్చిన సమాజం కోసం పూర్తి స్థాయి సామర్థ్యాలతో ,ధైర్యంతో పని చేస్తారు “ ఈ వెలుగులో గెజిటెడ్ ఆఫీసర్స్ సంఘ ఏర్పాటుకు పలు ప్రయత్నాలు జరిగాయి .
అధికారులు, ఉన్నత విద్యావంతులు, మేధావులు అంబేద్కర్ చెప్పినట్టు “పాలించే వర్గం కానప్పటికి సమాజంలో మేధావులు ప్రభావశీలంగా ఉంటారు ,వారు భవిష్యత్ ను చూడగలిగి మార్గదర్శనం చేసి నాయకత్వం వహిస్తారు. – అస్నాల శ్రీనివాస్
ఈ ఆలోచనలకు ,ఆరాటానికి ఒక సంఘటిత రూపం ఇవ్వడానికి ,ఆశయ సాధనకు అందరిని ఐక్యం చేయడానికి ,ఒకే గొంతుక ఇవ్వడానికి ,నాయకత్వం వహించి మిలిటెంట్ పోరాటాలకు అధికారులను సిద్ధము చేయడానికి 2007 నుండి పలు ప్రయత్నాలు జరిగాయి.భారత జాతీయోద్యమలో కాంగ్రెస్ ఆవిర్భావానికి ముందు దేశంలోని వివిధ ప్రాంతాలలో ఏర్పడిన వివిధ అసోసియేషన్స్ లాగా తెలంగాణ ఉద్యమంలో కూడా విడి విడిగా పలు ప్రయత్నాలు జరిగాయి.సమాచార శాఖలో పని చేస్తున్న వెంకటేశం అనే అధికారి టి యన్ జి ఓ రాష్ట్ర నేత సుధాకర్ మార్గదర్శనంలో మొదటిసారిగా టీజీఓ సంస్థను రిజిస్టర్ చేసి రెండు జిల్లాలలో కార్యక్రమాలను చేపట్టారు.ఇదే కాలంలో గెజిటెడ్ అధికారిగా ఉండి,తెలంగాణ ఉద్యమంలో క్రియాశీల పాత్ర పోషిస్తున్న ఖమ్మం జిల్లా టి యన్ జి ఓ కార్యదర్శిగా ఉన్న ఏలూరి శ్రీనివాసరావు ఖమ్మం జిల్లా కేంద్రంగా టీజీఓ రిజిస్టర్ చేసి పలు కార్యక్రమాలు చేపట్టారు.హైద్రాబాద్ నగర ,పాలమూరు జిల్లా కేంద్రంగా విరసనోళ్ల శ్రీనివాస్ గౌడ్ టీజీఓ ను రిజిస్టర్ చేసి ఉద్యమ కార్యక్రమాలలో పాల్గొన్నారు. వెంకటేశం స్థాపించిన టీజీఓ విస్తరణ ,కార్యక్రమాల నిర్వహణలో ఎక్కువ ప్రభావం చూపలేకపోయింది.
హైద్రాబాద్ కేంద్రంగా టీజీఓ ను ఏర్పాటు చేసిన శ్రీనివాస్ గౌడ్, ఏలూరి శ్రీనివాసరావు రాష్ట్ర సాకార ఉద్యమమలో గెజిటెడ్ అధికారులను సమీకరించడంలో దూకుడుగా పని చేయడంలో విశేష కృషి చేసారు. – అస్నాల శ్రీనివాస్
హైద్రాబాద్ కేంద్రంగా టీజీఓ ను ఏర్పాటు చేసిన శ్రీనివాస్ గౌడ్ రాష్ట్ర సాకార ఉద్యమమలో గెజిటెడ్ అధికారులను సమీకరించడంలో,దూకుడుగా పని చేయడంలో విశేష కృషి చేసారు.టి యన్ జి ఓ ఖమ్మం నేతగా ఉద్యమ పాఠాలను ,సంఘ నిర్మాణ నైపుణ్యాలను నేర్చుకున్న ఏలూరి శ్రీనివాసరావు ఖమ్మం జిల్లాతో పాటు ఉత్తర తెలంగాణ జిల్లాలో అధికారులను సంఘటితం చేయడంలో ,కదిలించడంలో చురుకుగా పాల్గొన్నారు. రెండు పాయలుగా కొనసాగుతున్న గెజిటెడ్ అధికారుల సంఘాలను ఏకీకృతం చేసే భాద్యతను టి యన్ జి ఓ అగ్ర నేత స్వామి గౌడ్ చేపట్టారు.తెలంగాణ సాకారంలో అనేక సమస్యలకు ఒక పరిష్కారం ఉంటుందని ,ఆ దిశగా నిబద్ధతతో,అంకిత భావంతో,క్రమశిక్షణతో ,జ్వలించే కెరటాల వంటి వ్యక్తిత్వంతో ఉన్న యువ శ్రీను ల ద్వయంతో రెండు సంఘాలను కలిపారు.టి జి ఓ వ్యవస్థాపక అధ్యక్ష్యుడిగా వి.శ్రీనివాస్ గౌడ్, ప్రధాన కార్యదర్శిగా ఏలూరి శ్రీనివాస రావు, వి.మమత, దశరథ్,పాపారావు,పురుషోత్తం రెడ్డి ఏ.సత్యనారాయణ లతో నూతన జవసత్వాలతో కూడిన తెలంగాణ గెజిటెడ్ అధికారుల సంఘం 2007లో రూపుదిద్దుకుంది.
చరిత్ర మాత ఇద్దరు నాయకులను సిద్ధం చేసింది.వీరిద్దరు చారిత్రక బౌగోళిక సామాజిక అధ్యయనం,ప్రజల,ఉద్యోగుల అవసరాల పై అవగాహన వెలుగులో ఈ ఇద్దరు నాయకులుగా టీజీఓ సారథ్యం చేపట్టారు.ఆంధ్ర లో విలీనం పేరుతో కోల్పోయిన తెలంగాణ రాష్ట్రాన్ని తిరిగి సాధించుకోవడానికి తొలి దశ తెలంగాణ రాష్ట్ర ఉద్యమానికి ఊపిరిలూదిన,ప్రగతిశీల ఉద్యమాలకు,తొలి తెలంగాణ మార్చింగ్ గీతాన్ని అందించిన రావెల్ల వెంకటరామారావు ను అందించిన ఖమ్మం మెట్టు తనయుడు ఏలూరి శ్రీనివాసరావు ,తెలంగాణ రాష్ట్రం సాకారం అత్యంత అవసరమైన కరువు వలసలకు చిరునామా ,ఆధునిక తెలంగాణ సాహిత్యోద్యమాన్ని నడిపించిన సురవరం ప్రతాపరెడ్డి ని అందించిన పాలమూరు తనయుడు వి.శ్రీనివాస్ గౌడ్ నాయకత్వంలో 2007 నుండి తెలంగాణ గెజిటెడ్ అధికారుల సంఘం రూపుదిద్దుకుని అనతి కాలంలో ఉద్యోగ వర్గాలను,ఉద్యమ ప్రస్థానంలో అగ్రశ్రేణిగా మారింది.2010లో అధికార గుర్తింపు పొందింది.ఎన్నో ఏళ్లుగా అపరిష్కృతంగా ఉన్న సీనియారిటీ సమస్యలను పరిష్కరించి పదోన్నతులను సాధించింది.ఉద్యమకాలంలో పోలీస్ శాఖ , అటవీ ,ఎక్సైజ్ వంటి యూనిఫార్మ్ ఉద్యోగులను,కలెక్టర్ మినహా అన్ని స్థాయిల అధికారులను సంఘంలో చేర్చుకొని మహా కవాతును నిర్వహించింది.610 జి ఓ ,ప్రెసిడెన్షియల్ ఆర్డర్ అమలుకు పోరాటాలను నిర్వహించింది.
ఉద్యమ కాలంలో పోరాటాన్ని కొత్త పుంతలు,గొప్ప ముందంజలు వేయడంలో టీజీఓ మేధో శ్రమత్వం ఇరువురి శ్రీనన్నల ద్వయం కీలక పాత్ర పోషించింది. అస్నాల శ్రీనివాస్
ఉద్యమ కాలంలో పోరాటాన్ని కొత్త పుంతలు,గొప్ప ముందంజలు వేయడంలో టీజీఓ మేధో శ్రమత్వం ఇరువురి శ్రీనన్నల ద్వయం కీలక పాత్ర పోషించింది.అసంఘటిత రంగంలో పని చేస్తున్న వివిధ రంగాల కార్మికులతో వందకు పైగా సంఘాలను ఏర్పరిచి వారి తక్షణ సమస్యలను పరిష్కరిస్తూ,ఉద్యమంలో భాగస్వాములను చేసారు. అణచివేతలకు,నిర్బంధాలకు భయపడక పోరాట క్రమంలో ముందుండి నడిచి సహచర అధికారులకు ప్రేరణగా నిలిచారు.పోరాటం కోసం నిర్మాణం,నిర్మాణం కోసం పోరాటం అన్నట్లుగా ఈ ఇరువురు నేతలు పని చేసారు.గొప్ప సాహసంతో నిలకడ గల పోరాటాలు చేసారు.ఈ క్రమంలో వీరిపై అక్రమ కేసులు బనాయించి అనేక సార్లు అరెస్ట్ చేసారు.
1998 నుండి మారోజు వీరన్న ,రాము సీతక్క ల మహాసభ ,గద్దర్,సాయిబాబ,గాదె ఇన్నయ్యల నేతృత్వంలో జనసభ నుండి మలి దశ ఉద్యమం ప్రారంభమైంది. 2001 లో మాజీ మావోయిస్ట్ గాదె ఇన్నయ్య ,కెసిఆర్ లు కలసి తెలంగాణ రాష్ట్ర సమితి స్థాపించి ఉద్యమం,మరియు చట్ట సభలలో ఎన్నికయ్యి తమ వాణి నీ వినిపించడం ద్వారా రాష్ట్ర సాధనకు కృషి చేసారు.మలి దశ ఉద్యమానికి సిదాంతకర్తగా ఆచార్య జయశంకర్ సార్ నిలిచారు.ప్రొఫెసర్ కోదండరాం నేతృత్వంలో అన్ని పక్షాలను కలుపుకొని ఐక్య కార్యాచరణ కమిటీ ఏర్పాటైంది.టి జాక్ ఆవిర్భావం ,పోరాటం కార్యక్రమంలో టీజీఓ జీవ వంత శక్తి వంత పాత్ర పోషించింది .ఈ క్రమంలో టీజీఓ నిర్మాణం అన్ని జిల్లాలకు విస్తరించింది.
తెలంగాణ మలి దశ ఉద్యమానికి సిదాంతకర్తగా ఆచార్య జయశంకర్ సార్ నిలిచారు.ప్రొఫెసర్ కోదండరాం నేతృత్వంలో అన్ని పక్షాలను కలుపుకొని ఐక్య కార్యాచరణ కమిటీ ఏర్పాటైంది. – అస్నాల శ్రీనివాస్
టీజీఓ తన పోరాట పటిమను అత్యున్నతంగా ప్రదర్శించడానికి ఫ్రీ జోన్ వ్యతిరేఖ ఉద్యమం ఒక వేదికగా నిలిచింది.తెలంగాణ సమాజం ఉవ్వెత్తున ఉప్పెనలాగా సంఘటితమవుతున్న కాలంలో సుప్రీం కోర్ట్ తీర్పు 14F ఆధారంగా హైద్రాబాద్ ను ఫ్రీ జూన్ గా పరిగణించి పోలీస్ నియామకాలు జరుపాలని భావించినప్పుడు దీనికి వ్యతిరేఖంగా టి యన్ జి ఓ ,టి జి ఓ ల నాయకత్వంలో వేలాదిగా ఉద్యోగులు టి యన్ జి ఓ భవన్ నుండి గన్ పార్క్ కు ప్రదర్శన జరిపారు.శ్రీనివాస్ గౌడ్,ఏలూరి శ్రీనివాసరావుల నాయకత్వంలో పెద్ద సంఖ్యలో అధికారులు ఈ ప్రదర్శనలో కదం తొక్కారు.తెలంగాణ ప్రాంత కాంగ్రెస్ శాసన సభ్యులు,పార్లమెంట్ సభ్యులు నిరంతరం రాష్ట్ర అవశ్యకతను తమ అధిష్ఠానానికి చెపుతూ ఒత్తిడి పెంచుతూనే ఉన్నారు.శాసనసభ ,లోకసభ లో తమ పోరాటాన్ని కొనసాగించారు.ప్రజా క్షేత్రంలో టి ఆర్ యస్ ,ఇతర రాజకీయ పక్షాలు ,పౌర సంస్థలు,ఉద్యోగ సంఘాలు పలు ఉద్యమ రూపాలతో కేంద్రంపై ఒత్తిడిని పెంచుతున్నాయి. ఈ నేపథ్యంలో జరిగిన సిద్దిపేట లో నవంబర్ 2.2009 లో జరిగిన ఉద్యోగుల గర్జన సభ చారిత్రాత్మకమైంది. పెన్ డౌన్, సకల జనుల సమ్మె ,మిలియన్ మార్చ్ ,సాగరహారం వంటి అనేక మిలిటెంట్ పోరాటాలకు టీజీఓ నాయకత్వం వహించింది. సంసద్ యాత్ర కు ఢిల్లీ కి భారీ సంఖ్యలో ఉద్యోగులను సమీకరించింది.2010 లో ఏర్పడిన రాజకీయ జాక్ లో కో చైర్మన్ పదవిని పొందింది.
పెన్ డౌన్, సకల జనుల సమ్మె ,మిలియన్ మార్చ్ ,సాగరహారం వంటి అనేక మిలిటెంట్ పోరాటాలకు టీజీఓ నాయకత్వం వహించింది. – అస్నాల శ్రీనివాస్
2007 నుండి జూన్ 2,2014 తెలంగాణ రాష్ట్ర సాధన వరకు ఆ తర్వాత నవ నిర్మాణములో టీజీఓ అసమాన పాత్ర పోషించింది.చరిత్ర నిర్మాణంలో తనకంటూ స్థానాన్ని సంపాదించుకుంది .ఆ భాద్యతను మనసా వాచా నిర్వహిస్తూనే ఉంది. ఉద్యమ కాలంలో ఉద్యమాన్ని ,ఉద్యోగాన్ని సమతూకం చేసుకుంటూ టి జి ఓ కొనసాగింది. మన సుందర భవిష్యత్ కోసం , దీర్ఘకాల బాగు కోసం తమ ప్రాణాలను సైతం త్యాగం చేసిన అమరవీరుల కుటుంబాలకు చేదోడు గా నిలిచింది .ఒక్క రోజు వేతనాన్ని అమరుల కుటుంబాలకు సహకారంను అందించింది.కరోనా కాలంలో సాహసోపేతమైన సేవలను అందించింది .ఉపాధి కోల్పోయిన వారికి ఆహార వస్తువులను అందించింది.
త్యాగాల పోరాటాల పునాదుల మీద ఏర్పడిన తెలంగాణ నవ నిర్మాణం కోసం అదనపు గంటలు పని చేస్తామని హామీ ఇచ్చిన టీజీఓ ఆ మేరకు శక్తి వంచన లేకుండా పని చేస్తున్నది.అధిక శ్రమ -పాలనలో దుబారా తగ్గింపు సూత్రంతో పని చేసింది.పది సంవత్సరాలు పాలించిన టి ఆర్ యస్ ,ఇప్పుడు అధికారంలో ఉన్న కాంగ్రెస్ ప్రభుత్వాల సంక్షేమ దార్శనికతను ప్రజలకు చేరవేయడంలో అంకిత భావంతో టీజీఓ లు పని చేస్తున్నారు .ఫలితంగా అప్పుడు ఇప్పుడు అనేక సామాజిక ఆర్ధిక సూచికలలో తెలంగాణ తక్కువ కాలంలో మెరుగైన ఫలితాలను సాధించింది.ఇదే కాలంలో పలు జిల్లాల కేంద్రంలో టి జి ఓ భవన నిర్మాణాలకు స్థల కేటాయింపులు జరిగాయి.హన్మకొండ భూపాలపల్లి జిల్లాలలో భవన నిర్మాణాలు పూర్తయ్యాయి. తొమ్మిదో పీఆర్సీని 39%,10 వ పీఆర్సీ ని 43% సాధించుకోవడంలో సోదర టీ యన్ జి ఓ తో కలసి సమస్త ఉద్యోగ వర్గాలకు దీప శిఖగా నిలిచింది . టి ఆర్ యస్ రెండవ దశ పాలన చివరి అంకంలో ఉద్యోగుల జీత భత్యాలు ,కరువు భత్యం ,ఈ కుబేర్ చెల్లింపులు ,బదిలీలు వంటి అనేక అంశాల్లో తీవ్ర జాప్యం జరిగింది .ఉద్యోగులలో అసంతృప్తి పెరగడం జరిగింది.సంఘాల నాయకత్వం అచేతనమైన స్థితికి లోనైంది. అనుత్పాదక రంగాలలో వ్యయం,నూతన రాష్ట్రానికి కేంద్రం నుండి నిధుల కేటాయింపులో వివక్షత ,ప్రజలు బలంగా కోరని చోట అమలు చేసిన సంక్షేమ పథకాల బరువు..మొదలగు కారణాలతో జీతాలు సక్రమంగా చెల్లించలేని స్థితి ఏర్పడింది. తమ కుటుంబ అవసరాలకు దాచుకున్న డబ్బులు ,ఆరోగ్య చికిత్స ఖర్చులు సకాలంలో రాకపోవడం ,వంటి కారణాలతో ఉద్యోగ వర్గాలలో తీవ్ర అసంతృప్తి జ్వాలలు చెలరేగాయి.ప్రభుత్వాన్ని సవరించడంలో,ఈ పరిస్థితులను ఉద్యమ రూపంగా మార్చటంలో టీజీఓ తో పాటు ప్రధాన సంఘాలు విఫలమయ్యాయి.
తొమ్మిదో పీఆర్సీని 39%,10 వ పీఆర్సీని 43% సాధించుకోవడంలో సోదర టీ యన్ జి ఓ తో కలసి సమస్త ఉద్యోగ వర్గాలకు దీప శిఖగా టీజీవో నిలిచింది. – అస్నాల శ్రీనివాస్
2023 ,డిసెంబర్ 7 ఎన్నికలలో రేవంత్ రెడ్డి నాయకత్వంలో కాంగ్రెస్ పార్టీ అధికారంలోకి వచ్చింది. ఎన్నికల సమయంలో ఉద్యోగులకు ఇచ్చిన హామీల అమలు కోసం ప్రభుత్వంతో సామరస్యత దౌత్యం చేయాల్సిన నూతన నాయకత్వం చారిత్రక అవసరంగా మారింది.
ఈ ప్రక్రియ చేపట్టడం కోసం ముందస్తుగా సంఘ నిర్మాణం పటిష్టం చేయడం ,ఐక్య సంఘటన ఏర్పాటు చేయడం ,క్రమశిక్షణ సుశిక్షితులైన నాయకత్వాన్ని రూపొందించడం అనివార్యత టి జి ఓ కు ఏర్పడింది.అన్ని జిల్లాలలో నేరుగా సభ్యులను కలసి సభ్యత్వ కార్యక్రమాన్ని నిర్వహించి,ఈ సందర్భంగా వారి మనోగతాన్ని తెలుసుకున్నారు. 42 వేల సభ్యత్వంను కలిగి ఉన్న టి జి ఓ లో స్వల్పకాలం కాలం కొనసాగిన ఉదాసీనత,సందిగ్ధ కాలం నుండి వెంటనే తేరుకుంది. 20,ఫిబ్రవరి 2024 టి జి ఓ నిర్మాణం గొప్ప ముందంజ వేసింది.హైద్రాబాద్ లో ప్రభుత్వము నియమించిన అధికారులు ఎన్నికల అధికారులుగా వ్యవహరించి ప్రజాస్వామిక విధానంలో నూతన కేంద్ర కమిటీని టీజీఓ సభ్యులు ఎన్నుకున్నారు.ఉస్మానియా యూనివర్సిటీ విద్యార్థిగా ,టి యన్ జి ఓ నేతగా తెలంగాణ ఉద్యమాన్ని సజీవంగా నిలపడంలో,2007 నుండి 2014 వరకు టి జి ఓ వ్యవస్థాపక ప్రధాన కార్యదర్శిగా తన సర్వ శక్తులను ఒడ్డి పని చేసిన ఏలూరి శ్రీనివాసరావు అధ్యక్షుడిగా ఏకగ్రీవంగా ఎన్నికయ్యారు.ప్రధాన కార్యదర్శిగా ఏనుగు సత్యనారాయణ తో పాటు శ్యామ్,ఉపేందర్ రెడ్డి,జగన్మోహన్ రావు,రామకృష్ణ గౌడ్,దీపారెడ్డి,యాదగిరి గౌడ్ లను కార్యవర్గ సభ్యులుగా ఎన్నుకున్నారు.ఉద్యమ కాలం నాటి సందడి,సందోహం,స్పూర్తితో కేంద్ర సంఘ కార్యవర్గం ఎన్నిక,అనంతర సభ జరిగింది.
ఎన్నికల సమయంలో ఉద్యోగులకు ఇచ్చిన హామీల అమలు కోసం ప్రభుత్వంతో సామరస్యత దౌత్యం చేయాల్సిన నూతన నాయకత్వం చారిత్రక అవసరంగా మారింది. – అస్నాల శ్రీనివాస్
టీజీఓ అధ్యక్ష్య,ప్రధాన కార్యదర్శులు సంఘ నిర్మాణం, ఉద్యోగుల అవసరాలు,సమస్యల పరిష్కారం కోసం పూర్తి సమయం ఇవ్వడం కోసం ప్రభుత్వం నుండి ఆన్ డ్యూటీ సౌకర్యాన్ని పొందింది.ఇది సభ్యులు ఎంతో కాలం నుండి కోరుకుంటున్న అంశం.సభ్యుల ఆకాంక్షల అనుగుణంగా 24/7 అధ్యక్ష్య,ప్రధాన కార్యదర్శులు కేంద్ర కార్యాలయంలో అందుబాటులో ఉంటూ, సచివాలయం ఇతర అన్ని శాఖల అధికారులతో కో ఆర్డినేట్ చేస్తూ నూతన పని విధానంను సంతరించుకున్నారు. వరుస ప్రాతినిధ్యాలతో ముఖ్యమంత్రితో సహ కేబినెట్ మంత్రులను కలుస్తూ ప్రాధాన్యత క్రమంలో పలు సమస్యల పరిష్కారంలోఏలూరి శ్రీనివాస రావు నేతృత్వంలో టీజీఓ చూపిన చొరవ ఉద్యోగవర్గాలను ఆకట్టుకున్నది. ఆత్మ విశ్వాసాన్ని పెంచింది.మొదటి తారీఖు జీతాలు, బదిలీలు,317 జి ఓ సవరణలు వంటి అంశాలలో విజయాలను నమోదు చేసుకున్నది. ప్రజల బాగులోనే ఉద్యోగ వర్గాల బాగు ఇమిడి ఉందనే సామాజిక తాత్వికతతో ఏర్పడిన టి జి ఓ ,తీవ్ర తుఫాను తెలంగాణ ను కల్లోల పర్చి నష్టం జరిగినప్పుడు తక్షణమే స్పందించి ఉద్యోగుల జాక్ ను ఒప్పించి ఒక రోజు వేతనాన్ని విరాళంగా ప్రకటింపచేసారు.ఈ క్రమంలోనే టీజీఓ సంస్థాగత నిర్మాణం పై ప్రత్యేక దృష్టిని సారించింది.సంఘ నిర్మాణ సూత్రాలను,విధి విధానాలను రూపొందించుకుని ప్రభుత్వంతో ఆమోదింపచేసుకుంది.33 జిల్లాల టీజీఓ జిల్లా శాఖలను,రెండు ప్రత్యేక శాఖలైన హైద్రాబాద్ నగర శాఖ,సచివాలయ శాఖ నిర్మాణంను పూర్తి చేసుకుంది.ప్రతి జిల్లాలో టీజీఓ నిర్మాణంలో రావడం కోసం,నాయకత్వ స్థానంలో పని చేయడం కోసం ఉత్సాహంతో వందలాదిగా వచ్చిన వైనం కనిపించింది.ఏకపక్ష నిర్ణయాలకు చోటును ఇవ్వలేదు. సయోధ్య, సంప్రదింపులు, ఏకాభిప్రాయం, అనివార్యమైన చోట ఓటింగ్ ద్వారా కమిటీల నిర్మాణం ఏర్పాటు చేసుకుంది.వృత్తి నిబద్ధత ,సామాజిక భాద్యత, హక్కులకై కలబడు,భాద్యతలకై నిలబడు ,పనిలో దివ్యత్వం ఉంది అనే నినాద సూత్రాలను అవాహన చేసుకున్న టీజీఓ పటిష్ట నిర్మాణం జిల్లా కేంద్రాల నుండి కేంద్ర సంఘము వరకు జరిగింది.ఇదే నిర్మాణ సూత్రాలను 106 కి పైగా వివిధ శాఖల టి జి ఓ అనుబంధ ఫోరంలకు వర్తింప చేసింది.
పెరిగిపోతున్న టోకు ధరల సూచీ,వినియోగ ధరల సూచీ మేరకు సహజ న్యాయంగా రావాల్సిన కరువు భత్యం రావడంలో ప్రభుత్వం నుండి కనీస కదలిక లేకపోవడం ఉద్యోగ వర్గాలను నిరాశ పరిచింది. అడగందే ,ఆందోళన చేయందే అధికారం దేనికి చోటు ఇవ్వదు, గతంలో జరగలేదు, ఇక ముందు జరగబోదు ఉద్యోగుల సహనంతో ప్రభుత్వం హద్దులు గీసుకుంటుంది. ఉద్యోగ వర్గాలు సహనాన్ని చెరిపివేసుకుంటే ప్రభుత్వం కూడా హద్దులు చెరిపివేసుకుని వారి సమస్యల పరిష్కారం కోసం కదులుతుంది. కష్టమైన,తీవ్రమైన పోరాటం లేకుండా చెమటోడ్చకుండా ఏ విజయం రాదు అనే సార్వత్రిక చారిత్రక సూత్రంతో చరిత్ర గమనం ఉంటుందనే అవగాహనని కలిగివున్న టి జి ఓ ఉద్యోగుల ఐక్య కార్యాచరణ సమితిని క్షేత్ర స్థాయి నుండి పటిష్టం చేయాలని భావించింది.వివిధ కేడర్లలో ఉన్న పది లక్షల ఉద్యోగ వర్గాలను ఒకే త్రాటికి తెచ్చి,ఒకే గొంతుకతో విశాల ప్రాతిపదికతో పని చేయడానికి నిర్ణయించింది.
మొదటి తారీఖు జీతాలు, బదిలీలు,317 జిఓ సవరణలు వంటి అంశాలలో విజయాలను టీజీవో నమోదు చేసుకున్నది. – అస్నాల శ్రీనివాస్
24 సెప్టెంబర్ 2024 సుందరయ్య భవన్ ఉద్యోగ సంఘాల ఐక్య సంఘటనలో చారిత్రాత్మక ఘట్టం నమోదైంది.టి యన్ జి ఓ అధ్యక్షుడు మారం జగదీష్ చైర్మన్ గా ,టి జి ఓ అధ్యక్షులు ఏలూరి శ్రీనివాసరావు సెక్రటరీ జనరల్ గా 206 ఉద్యోగ సంఘాలతో తెలంగాణ ఉద్యోగుల ఐక్య కార్యాచరణ కమిటీ ఏర్పడింది .పదవిని పోరాట సాధనంగా
ఉద్యోగులకు సేవ చేసే సాధనంగా. ప్రతి సందర్భాన్ని వారి సమస్యలను ప్రస్తావించే వేదికలుగా. అభిప్రాయాలలో పరిస్థితులలో వైవిధ్యం ఉన్నప్పటికీ గొప్ప సంకల్పబలంతో
206 సంఘాలను ఐక్య సంఘటనను ఏర్పాటు చేయడంలో టి జి ఓ అసమాన పాత్ర పోషించింది .పట్టు విడుపులతో
శాంతియుత ప్రతిఘటన ,సత్యాగ్రహ పద్ధతులలో ఉద్యోగులు ,ప్రజలు ఆర్తితో ఎన్మో ఆశలతో తెచ్చుకున్న ప్రజా ప్రభుత్వం ముందు కీలక సమస్యల పరిష్కారానికి చొరవ చూపాలని తీర్మానం చేసింది. అభివృద్ధి నిధుల కేటాయింపులో తెలంగాణ పట్ల కేంద్రం చూపుతున్న వివక్షపై ప్రజా ప్రభుత్వం చేసే పోరాటానికి అండగా ఉంటామని ప్రకటించింది.అదే సమయంలో ఉద్యోగుల మౌలిక సమస్యల పరిష్కారానికి ప్రభుత్వం నుండి స్పందన లేకపోతే దశల వారీగా నిరసన తెలిపే కార్యాచరణను ప్రకటించింది .ఈ సభలో పొలిటికల్ జాక్ చైర్మన్ ప్రొఫెసర్ కోదండరాంను ఘనంగా సత్కరించారు. ఈ సభ ఫలితాన్ని ఇచ్చింది తాత్కాలిక ఉపశమనం కోసం ఒక విడత కరువుభత్యంను ప్రభుత్వం ప్రకటించింది.
ఉద్యోగులతో నడిచేదిగా, ఉద్యోగ వర్గానికి ఒకడుగు ముందు నడిపేదిగా టిజిఓ ను మలుస్తున్న వైనం అపూర్వం. – అస్నాల శ్రీనివాస్
మేధో శ్రామికత్వంతో క్రమశిక్షణ గలిగిన అగ్రగామి సంఘంగా, ఆవిర్భావం నాటి చైతన్యాన్ని నింపుతూ ఉద్యోగులతో నడిచేదిగా ,ఉద్యోగ వర్గానికి ఒకడుగు ముందు నడిచేదిగా టిజిఓ ను మలుస్తున్న వైనం అపూర్వం. ఒక సంఘ చరిత్రలో 18 సంవత్సరాల కాలం అతి చిన్నది.అనతి కాలంలో అగ్రశ్రేణి సారధిలలో ఒకరిగా తెలంగాణ రాష్ట్ర సాధనలో, ఉద్యమ, ఉద్యోగ ఆకాంక్షల మేరకు పని చేయడంలో అసమాన పని తీరును కనపర్చింది.సమాజ సంక్షేమమలో ఉద్యోగ సంక్షేమం ఇమిడి ఉందనే అవగాహన వెలుగులో తనకంటూ టీజీఓ ఒక అధ్యాయాన్ని సృష్టించుకుంది.ఈ అవగాహనతో పని చేసే ప్రభుత్వాలకు వెన్నుదన్నుగా ఉంటుంది.విస్మరిస్తే వెరవకుండా విమర్శిస్తుంది.నిత్య నూతన,నిరంతర చలనం,కార్యాచరణతో ఉద్యోగ సంఘాలకు కరదీపికగా మారింది. ఈ వారసత్వం సూర్య చంద్రులు ఉన్నంత మేరకు కొనసాగుతూనే ఉంటుంది.
ఉద్యమాలు నాయకులను సృష్టిస్తాయి
నాయకులు ఉద్యమాన్ని సృష్టించలేరు – అస్నాల శ్రీనివాస్
